Rusia pas deklaratës së Zelensky-t mbi zgjedhjet: Shohim si do të zhvillohen gjërat

Rusia tha të mërkurën se do të “shohë se si do të zhvillohen gjërat” pas deklaratës së presidentit ukrainas Volodymyr Zelenskyy se është “gati” për të mbajtur zgjedhje presidenciale nëse sigurohet siguria.

Duke folur me gazetarët në një konferencë për shtyp, zëdhënësi i Kremlinit, Dmitry Peskov, tha se çështja e mbajtjes së zgjedhjeve në Ukrainë është diçka për të cilën presidenti rus Vladimir Putin “ka folur për një kohë të gjatë” dhe se edhe presidenti amerikan Donald Trump “ka folur së fundmi për” këtë çështje.

“Do të shohim se si do të zhvillohen gjërat në këtë drejtim”, tha Peskov, duke shtuar se Moska ende nuk e ka diskutuar çështjen me “askënd”, përfshirë SHBA-në.

“Ne po punojmë për paqe, jo për një armëpushim. Një paqe e qëndrueshme, e garantuar dhe afatgjatë, e arritur përmes nënshkrimit të dokumenteve përkatëse, është një përparësi absolute”, tha Peskov lidhur me vërejtjet e Zelenskyy-t mbi gatishmërinë e Ukrainës për një armëpushim energjetik nëse edhe Rusia pajtohet.

Zelenskyy tha të martën se është “gati” të mbajë zgjedhje presidenciale brenda 60-90 ditësh nëse sigurohen kushtet e sigurisë dhe ato ligjore, duke u bërë thirrje partnerëve amerikanë dhe evropianë të ndihmojnë në krijimin e mjedisit të nevojshëm për një votim në kohë lufte.