Rutte: Fitorja e Rusisë në Ukrainë do të kishte pasoja të mëdha për NATO-n

Sekretari i Përgjithshëm i NATO-s, Mark Rutte, ka paralajmëruar se një fitore e Rusisë në Ukrainë do të minonte besueshmërinë e NATO-s dhe do të kërkonte triliona euro për rikthimin e fuqisë parandaluese të aleancës ushtarake.

Në një deklaratë gjatë Forumit Ekonomik Botëror në Davos, Rutte tha se humbja e Ukrainës do të kishte kosto shumë më të lartë sesa mbështetja aktuale që Perëndimi i jep këtij vendi për të përballuar agresionin rus. “Nuk do të jenë miliarda shtesë; do të jenë triliona shtesë,” theksoi ai.

Ai shtoi se NATO po rrit praninë e saj në krahun lindor për të frenuar përhapjen e konfliktit në territoret e aleatëve të saj, ndërsa Perëndimi duhet të intensifikojë mbështetjen për Ukrainën për të ndryshuar trajektoren e luftës.

Rutte gjithashtu paralajmëroi kundër një zgjidhjeje të nxituar për paqen që do të favorizonte Moskën. “Një marrëveshje e keqe do të ishte një fitore për presidentin rus, duke festuar me aleatët e tij nga Koreja e Veriut, Irani dhe Kina. Kjo do të ishte një gabim i madh gjeopolitik,” përfundoi ai.

Deklaratat vijnë mes shqetësimeve për ndikimin e mundshëm të bisedimeve të ardhshme mes presidentëve Trump dhe Putin në zgjidhjen e konfliktit.

LEXONI GJITHASHTU:

• Rutte: Presim që zgjedhjet në Kosovë të mos ndikojnë në destabilizim të situatës
• Flotilja e NATO-s mblidhet për të mbrojtur kabllot nënujore në Detin Baltik