Sa mund të mbajë Shqipëria nga COVID-19? Eugena Tomini jep shifrat: Kapacitetet shëndetësore janë në alert

Shefja e Epidemiologjisë në Institutin e Shëndetit  Publik, Eugena Tomini tha në Euronews Albania se pavarësisht luhatjeve të rasteve me COVID-19, strukturat shëndetësore po bëjnë maksimumin për të mbajtur situatën nën kontroll.

“Kemi një ulje nga 24 orëshi i fundit, por duhet thënë se hetimi epidemiologjik vijon. Fazat e lehtësimit të masave, ka bërë që të kemi kontakte më të shumta. Shpresojmë se kjo situatë të monitorohet dhe të shkohet drejt uljes”, tha ajo.

Por a rrezikon Shqipëria të shkojë drejt mbylljes duke parë trendin e personave të infektuar me coronavirus, znj. Tomini u shpreh se ky vendim do të aplikohet bazuar në disa kritere.

“Pavarësisht se janë tre indikatorët kryesorë që janë vlerësuar dhe monitorohen çdo dy javë, Komiteti Teknik po vlerëson trendin e rasteve të reja në 24 orë, por ndërkohë një mesatare ditore e vlerësuar  në fund të dy javëve do të bëjë edhe vlerësimin nëse do të kemi një kthim prapa.

Është shumë e rëndësishme që të kuptojmë impaktin që pati karantina. Duhet të ndërgjegjësohemi dhe t’i respektojmë masat për të mos u kthyer pas. Shpresojmë që mos të kemi kthim pas nëse do të kemi bashkëpunim me popullatën”, tha ajo.

Specialistja e Epidemiologjisë tha se Shqipëria zotëron rreth 550 shtretër, që mund të përdoren në rast nevoje për pacientët që kërkojnë trajtim spitalor.

Drejtorja e lajmeve në Euronews Albania, Ilva Tare pyeti znj. Tomini se cili është pragu maksimal i të shtruarve në terapi intensive, që mund të përballojë pa vështirësi sistemin ynë shëndetësor, ajo dha këtë përgjigje:

“Kapacitetet shëndetësore aktualisht janë në alert, ne kemi rreth 550 shtretër sa i takon kapaciteteve për COVID-19. Këto janë mbështetje sa i takon asistencës së personave që do të kërkojnë trajtim spitalor. Janë shtuar respiratorët, të cilat janë në ndihmë të personave që do të kërkojnë oksigjeno-terapi apo trajtim reanimator. Intervali i personave që duhet të jenë në terapi intensive është nga 20-25 persona. Nuk janë vetëm kriteret e rritjes së rasteve, por varet edhe nga kapacitetet shëndetësore për të përballuar fluksin”, tha ajo. 

Teksa foli për rastin e mbylljes së kopshtit në Tiranë pasi një edukatore o diagnostikua me COVID-19, Tomini u shpreh se fatmirësisht nuk janë konfirmuar fëmijë të prekur.

“Jo nuk ka pasur raste të infektuarish tek fëmijët. Janë marrë masat në kohë dhe ndërkohë personat e tjerë që kanë qenë persona të kontaktit janë në karantinë. Situata po monitorohet”, theksoi ajo.