Sanksionet amerikane ndaj Rusisë, rritet çmimi i naftës në bursat ndërkombëtare

Sanksionet e reja amerikane ndaj prodhuesve rusë të naftës po shkaktojnë një rritje të ndjeshme të çmimeve të naftës në tregjet ndërkombëtare.

Brenda një jave, çmimi ka pësuar një rritje prej më shumë se 7%.

Aktualisht, një fuçi naftë në bursën europiane kuotohet me 81 dollarë, duke u rritur ndjeshëm nga 76 dollarë që ishte më 8 janar.

Po ashtu, bursat amerikane kanë regjistruar luhatje të ngjashme.

Sanksionet amerikane synojnë prodhuesit rusë të naftës dhe anijet cisternë që transportojnë këtë lëndë djegëse, dhe pritet të kenë ndikim të rëndësishëm në treg.

Ndërkohë, efekti nuk është ndjerë ende në Shqipëri, ku pikat e karburanteve po tregtojnë ende me çmimet e javës së kaluar.

Megjithatë, ekspertët ndërkombëtarë shprehen të shqetësuar për mundësinë e destabilizimit të tregjeve globale të naftës.

Një nga pasojat më të mëdha të sanksioneve është se flota e anijeve cisternë që Rusia përdor për eksportimin e naftës do të zvogëlohet ndjeshëm, duke rritur kështu kostot e transportit të mallrave.

Gjatë vitit 2024, më shumë se 180 anije cisternë transportuan mbi 530 milionë fuçi naftë, që përbënin rreth 42% të eksporteve të përgjithshme të naftës ruse me rrugë detare.

Nga këto, rreth 300 milionë fuçi u dërguan në Kinë dhe pjesa tjetër në Indi. Përveç embargos ndaj anijeve cisternë, Uashingtoni ka vendosur sanksione të tjera ndaj dy prej kompanive më të mëdha ruse të naftës.

LEXONI GJITHASHTU:

• Nafta, hekuri dhe kromi 3 produktet që dominojnë ekonominë, 1 mld euro shitje
• Presidenti i Azerbajxhanit: Nafta dhe gazi janë dhuratë prej Zotit