Scholz takon Stoltenberg: Do mbrojmë pikat e dobëta të Aleancës

Gjermania do të përforcojë pozitën e saj në radhët e NATO-s. Disa ditë pasi aprovoi Strategjinë për Sigurinë Kombëtare, që parashikon shpenzimet më të mëdha ushtarake që prej Luftës II Botërore, kancelari gjerman i bëri të qartë sekretarit të përgjithshëm të Aleancës se cili është roli i saj.

“NATO është dhe mbetet një garantues qendror dhe jetik i sigurisë sonë kolektive. Ne do të përdorim një pjesë të madhe të trupave tona për të mbrojtur pikat e dobëta të Aleancës sonë”, tha kancelari gjerman Olaf Scholz.

Stoltenberg mirëpriti planin e Gjermanisë për të shpenzuar 2 për qind të GDP-së për mbrojtjen brenda 2024-s. Kjo kuotë duhet të jetë fillimi dhe jo kufiri i shpenzimeve, tha ai.

“Ukraina ka të drejtë të çlirojë tokën e saj dhe kundërofensiva tashmë ka nisur. Sa më shumë tokë të çlirojë, aq më e fortë do të jetë në tryezën e negociatave”, deklaroi Stoltenberg.

Dy liderët folën edhe për samitin e ardhshëm të NATO-s në Vilnius, që nuk do të rezultojë në një “ftesë formale” për Kievin që t’i bashkohet Aleancës.

LEXO GJITHASHTU:

• Tensionet në veri, Stoltenberg: Jemi të palëkundur për misionin tonë në Kosovë 
• “Të pranojnë takimin pa asnjë kusht” BE ultimatum Kurtit e Vuçiç: Refuzimi ka pasoja
• Rama: Nëse s’lirohen policët këtë javë, rikthehet akulli në marrëdhëniet me Serbinë