Sejamini: Menaxhimi i situatës së tërmetit e ka shpëtuar PS-në nga një humbje e thellë në Durrës

Gazetari Neritan Sejimani, bëri një analizë mbi rezultatin paraprak të Exit Poll për qarkun e Durrësit, ku PS kryeson me 42,4 – 48,4%, ndërsa PD renditet e dyta me 37,4 – 43,4%.

Z. Sejamini u shpreh se nëse në Durrës nuk do të kishte ndodhur tërmeti dhe menaxhimi i kësaj situate nga pandemia, atëherë në Durrës PD-ja do të kishte një përqindje më të lartë votash.

“Edhe Elbasani edhe Durrësi do të ishin si Tirana po të mos kishin ndodhur ngjarje specifike. Në Durrës ndodhi tërmeti dhe ne e kemi parë në sondazhe”, u shpreh z. Sejamini.

Gazetari i Euronews Albania tha më tej se pavarësisht se qytetarët e Durrësit janë të pakënaqur me qeverinë, kjo pakënaqësi është mbuluar me menaxhimin e situatës pas tërmetit nga ana e qeverisë. Sipas z. Sejamini, kjo gjë i ka kushtuar PD-së, 1-2 mandate.

“Pakënaqësia në Durrës me qeverinë është 60%, ndërsa kur vjen puna se si qeveria ka menaxhuar tërmetin në Durrës është  pozitive 60%.  Ndoshta kjo mund të kishte bërë ndryshimin që përkthehet në 1-2 mandate”, u shpreh z. Sejamini, duke shtuar se sipas tij në Durrës PDF-ja duhet të kishte fitore më të thellë se Tirana, pasi në të gjitha sondazhet që janë bërë pakënaqësia me qeverinë ka qenë e madhe, por ka ndikuar menaxhimi i situatës së tërmetit nga qeveria.

Ish kreu i KQZ-së, Denar Biba tha se fakti se qeveria ka menaxhuar mirë situatën në Durrës, nuk përbën lajm të keq.

“Kjo nuk është domosdoshmërish diçka e keqe, fakti që qeveria ka punuar mirë për tërmetin” u shpreh z. Biba.