“Sekretari i Mbrojtjes investim në kompani armësh para luftës në Iran?”, reagon Pentagoni

Një zëdhënës i Pentagonit ka mohuar me forcë një raport të publikuar në Financial Times, sipas të cilit një ndërmjetës i Sekretarit amerikan të Mbrojtjes, Pete Hegseth, kishte tentuar të bënte një “investim të madh” në kompani të lidhura me ushtrinë në javët para luftës me Iranin.

“As Sekretari Hegseth dhe as ndonjë nga përfaqësuesit e tij nuk i janë drejtuar BlackRock për ndonjë investim të tillë,” tha Sean Parnell, zëdhënësi kryesor i Pentagonit.

“Ky është edhe një tjetër sulm i pabazë dhe i pandershëm, i krijuar për të çorientuar publikun,” shkroi Parnell në X, duke kërkuar tërheqjen e menjëhershme të pretendimeve.

Raporti i Financial Times u publikua të hënën, duke cituar burime anonime.

Hegseth ka qenë një figurë kryesore në përpjekjet e luftës dhe shpesh ka drejtuar konferenca për shtyp, duke mbrojtur sulmin ndaj Iranit.