Serbia përballet me sfida energjetike nga SHBA-ja dhe Rusia

Vetëm brenda një jave, Serbia mori dy lajme që ngritën pyetje për sigurinë e saj energjetike, ndërsa Shtetet e Bashkuara filluan të zbatojnë sanksione ndaj Industrisë Serbe të Naftës, NIS, për shkak të pronësisë së saj ruse.

Moska vendosi që marrëveshja e gazit me Beogradin të zgjatet vetëm deri në fund të vitit, e cila shkaktoi shqetësimin, pavarësisht garancive nga autoritetet, nëse do të ketë sasi të mjaftueshme të energjisë për ngrohje.

E vetmja kompani në Serbi që merret me hulumtimin, prodhimin dhe përpunimin e naftës, NIS, u vendos nën sanksionet e Shteteve të Bashkuara që nga 9 tetori, për shkak të pronësisë së saj ruse.

Në anën tjetër, presidenti i Serbisë, Aleksandar Vuçiç, foli edhe për një “lajm shumë zhgënjyes”, ku Rusia zgjati marrëveshjen e gazit me Serbinë deri në fund të vitit, dhe jo për tre vjet, siç prisnin autoritetet serbe.

Ekonomisti Lubodrag Saviq thotë se nuk pritet ndalim i furnizimit me gaz për Serbinë, e as rritje e çmimit të tij.

“Kjo është një lëvizje taktike e Rusisë, një lloj presioni ndaj Serbisë me një mesazh të qartë: Ne jemi të hapur për bisedime, por nuk do të ketë nacionalizim të NIS-it”, tha ai.

Ndërkohë, Vuçiç u shpreh më 11 tetor se zyrtarët amerikanë i kanë sugjeruar që Serbia ta nacionalizojë NIS-in për të shmangur sanksionet, por ai tha se e ka refuzuar këtë.

Pas një takimi me një delegacion rus lidhur me NIS-in, më 13 tetor, Vuçiç njoftoi në rrjetin social Instagram se nuk do të ketë asnjë mungesë të naftës apo produkteve të saj dhe asnjë krizë energjetike.

LEXONI GJITHASHTU:

• Vuçiç: Në kampin për stërvitje luftarake në Serbi ishin edhe 3 shtetas rusë