‘Shamia’ ngre në këmbë Iranin, presidenti Raisi akuzon Perëndimin për hipokrizi

Mes protestave masive që kanë shpërthyer në Iran për shkak të vdekjes së një 22-vjeçareje, e cila u dënua se kishte veshur keq hixhabin, presidenti Iranian Ebrahim Raisi doli në një deklaratë për mediat duke u shprehur se rasti është duke u hetuar.

Ai akuzoi Perëndimin për standarde të dyfishta për atë çka po ndodh në vendin e tij.

“Kur këto incidente ndodhin në të gjithë botën, duhet të zbatohet i njëjti standard. Por ka thirrje për hetime vetëm për këtë çështje… pse të mos kërkojmë pikërisht të njëjtën gjë për ata që humbin jetën në duart e forcave të rendit dhe agjentëve të tjerë në të gjithë Perëndimin, Evropën, Amerikën e Veriut, Shtetet e Bashkuara të Amerikës? Për ata që torturohen padrejtësisht. Pse nuk ka hetime që vijojnë?”, tha presidenti Raisi.

Mbi 25 persona raportohet se kanë humbur jetën gjatë protestave dhe përplasjes me policinë; nuk ka sinjale se demonstratat do të përfundojnë shpejt.

Në kundërpërgjigje të protestave, autoritete kanë mbyllur rrjetet sociale në vend, si Whatsapp dhe Facebook.

Irani nuk ka përjetuar protesta kaq të forta që nga nëntori i vitit 2019, edhe pse atë kohë ishte për çmimet e naftës.

LEXONI GJITHASHTU:

• Protesta për vdekjen e 22-vjeçares në Iran, avokatja: Është e nxitur politikisht
• Zemërim ndaj regjimit iranian, vijojnë protestat për vajzën që u vra për shaminë