SHBA dhe BE, në lëvizje për të parandaluar zgjerimin e konfliktit në Lindjen e Mesme

Përpjekjet diplomatike amerikane dhe evropiane për të frenuar konfliktin në Lindjen e Mesme vazhdojnë. Sekretari amerikan i Shtetit ndaloi në Katar, ku zhvilloi bisedime me princin Tamim dhe ministrin e Jashtëm Al Thani.

Më vonë, Antony Blinken theksoi se prioritet i turit të tij ishte parandalimi i zgjerimit të konfliktit, ndërsa foli edhe për katastrofën humanitare në Gaza.

 “Shumë civilë palestinezë po vuajnë nga mungesa e ushqimit, ujit, medikamenteve dhe elementë të tjerë bazikë. Fëmijët janë më të prekurit”,-tha Antony Blinken, sekretar i Shtetit, SHBA.

Ministrja e Jashtme gjermane, Annalena Baerbock u takua me presidentin izraelilt Isaac Herzog në Izrael. Më vonë ajo u takua me homologun Israel Katz, ku afirmoi të drejtën e shtetit hebre për t’u vetëmbrojtur, si dhe nevojën për të mbrojtur civilët palestinezë.

 “Po bëhet gjithnjë e më e qartë se Izraeli duhet të bëjë më shumë për të mbrojtur civilët në Gaza. Ai duhet të gjejë një mënyrë për ta luftuar Hamasin pa dëmtuar civilët”,-tha Annalena Baerbock, ministre e Jashtme e Gjermanisë.

Ndërkohë, pasi zhvilloi bisedime në Liban, shefi i Politikës së Jashtme të BE-së, Josep Borrell udhëtoi drejt Arabisë Saudite për të biseduar mbi konfliktin.

LEXONI GJITHASHTU:

• Blinken: Izraeli e ka të qartë, duhet t’i mbrojë civilët në Gaza
• Blinken nga Brukseli: Kosova në qendër të shqetësimeve, s’duam konflikte në Ballkan