SHBA dhe Britania e Madhe këshillojnë qytetarët të largohen nga Libani

Ambasadat amerikane dhe britanike në Bejrut kanë këshilluar qytetarët e tyre që të largohen nga Libani ndërsa fluturimet “janë të disponueshme” pasi tensionet kufitare midis Izraelit dhe Hezbollahut intensifikohen për shkak të luftës Izrael-Hamas.

Të dy vendet kishin paralajmëruar tashmë qytetarët për të mos udhëtuar drejt Libanit.

“Ne rekomandojmë që qytetarët amerikanë në Liban të marrin masat e duhura për t’u larguar nga vendi”, thuhet në një deklaratë të ambasadës amerikane.

Një paralajmërim i ngjashëm u lëshua nga ambasada britanike, e cila tha: “Nëse jeni aktualisht në Liban, ju inkurajojmë të largoheni tani ndërsa opsionet mbeten të disponueshme”.

“Shtetasit britanikë duhet të tregojnë kujdes dhe të shmangin zonat ku mund të mbahen demonstrata,” thuhej gjithashtu në njoftim.

Hezbollahu dhe fraksionet aleate palestineze kanë shkëmbyer zjarrin e përditshëm ndërkufitar me Izraelin pasi Hamasi filloi sulmin e tij masiv në Izraelin jugor, duke vrarë më shumë se 1,400 njerëz, kryesisht civilë.

Sulmet izraelite në Gaza kanë vrarë të paktën 3,500 njerëz, kryesisht civilë, sipas zyrtarëve shëndetësorë në territorin e drejtuar nga Hamasi.

Shumë vende arabe dhe perëndimore kanë inkurajuar tashmë shtetasit e tyre që të shmangin udhëtimin në Liban ose të largohen, me Arabinë Saudite të mërkurën që u bëri thirrje qytetarëve të saj të largohen “menjëherë” nga Libani dhe Kuvajti gjithashtu paralajmëroi kundër udhëtimit atje.

Franca, Gjermania, Kanadaja dhe Australia gjithashtu kanë paralajmëruar kundër udhëtimit në Liban, ndërsa Spanja ka këshilluar të mos bëhen udhëtime nëse s’janë të nevojshme.

Tensionet ndërkufitare kanë vrarë të paktën 21 persona në Liban, sipas një raporti të AFP-së, kryesisht ushtarakë, por edhe tre civilë, duke përfshirë një gazetar të Reuters.

Të paktën tre persona janë vrarë në anën izraelite.

Që nga e marta, si në shumë kryeqytete arabe, demonstruesit kanë dalë në rrugët e Bejrutit dhe periferive të tij, edhe pranë ambasadave amerikane dhe franceze, për të protestuar kundër sulmit vdekjeprurës në një spital në Gaza.

LEXONI GJITHASHTU:

• Si ka nisur konflikti Izrael-Palestinë që ka marrë mijëra jetë njerëzish
• Palestinezët raportojnë për viktima nga sulmet izraelite në Gazë