Ish-zëvendëspresidenti amerikan dhe republikani i përjetshëm Dick Cheney ka konfirmuar se do të votojë për Kamala Harris të demokratëve në zgjedhjet presidenciale të nëntorit.
Zoti Cheney, i parë si një figurë me ndikim gjatë presidencës së Xhorxh W Bush, lëshoi një deklaratë duke thënë se “nuk ka pasur kurrë një individ që është një kërcënim më i madh për republikën tonë sesa Donald Trump”, kandidati aktual republikan.
Vajza e tij, ish-deputetja republikane Liz Cheney, i kishte thënë një auditori në Teksas më herët se babai i saj kishte në plan të mbështeste kandidatin demokrat.
“Ai [Trump] u përpoq të vidhte zgjedhjet e fundit duke përdorur gënjeshtra dhe dhunë për të mbajtur veten në pushtet pasi votuesit e kishin refuzuar”, tha zoti Cheney. “Atij nuk mund t’i besohet kurrë më pushteti.”
“Si qytetarë, secili prej nesh kemi për detyrë ta vendosim vendin mbi partishmërinë për të mbrojtur kushtetutën tonë,” shtoi ai. “Kjo është arsyeja pse unë do të jap votën time për zëvendëspresidenten Kamala Harris.”
LEXONI GJITHASHTU:
- Kamala Harris dhe Tim Walz sot në intervistën e parë të rëndësishme televizive
- Kamala Harris mbledh 540 milionë dollarë donacione për fushatën presidenciale