SHBA/ Mision ushtarak në gaza, port për hyrjen e ndihmave humanitare

Presidenti Joe Biden njoftoi krijimin e një baze amerikane në Gaza për qëllime humanitare. Duke garantuar se nuk do të jetë një dërgim trupash në terren, Biden i kërkoi Izraelit të bëjë pjesën e tij për të garantuar një ambient të sigurt për shpërndarjen e ndihmave për popullin e Gazës.

 “Izraeli duhet të bëjë pjesën e tij. Ai duhet të lejojë më shumë ndihma në Gaza dhe të sigurojë që punonjësit humanitarë të mos gjenden në mes të zjarrit. Ata kanë njoftuar se do të hyjnë në veri të Gazës. Ndaj lidershipit izraelit i them këtë: asistenca humanitare nuk mund të jetë një opsion i dytë. Mbrojtja e jetëve të pafajshme duhet të jetë prioritet”,-Joe Biden, president i SHBA.

Nga ana e tij, shteti hebre deklaron se problemi nuk është transporti ndërkufitar i ndihmave, por shpërndarja e tyre në Gaza. Një zëdhënës qeveritar akuzoi luftëtarët e Hamasit se po vjedhin ndihmat ndërkombëtare që duhet të shkojnë për popullin e Gazës.

 “Le ta bëjmë të qartë. Izraeli ka nën kontroll të gjitha ndihmat që vijnë, apo që hidhen nga ajri. Ne do të vazhdojmë ta bëjmë këtë dhe po përmirësohemi çdo ditë, por Hamasi po përpiqet t’i vjedhë ndihmat. Ata e kanë bërë këtë vazhdimisht dhe po të mos ishin ata askush nuk do të ndihej i uritur”, Avi Hyman, zëdhënës i qeverisë izraelite.

Koordinatori i OKB-së për Gazën, Sigrid Kaag, duke folur nga Pallati i Qelqtë, e cilësoi shpërndarjen e ndihmave nga ajri një “dëshmi të humanizmit”, por theksoi se ato janë “një pikë uji në oqean”, duke lënë të kuptohet se rrugët tokësore janë zgjidhja optimale.

LEXONI GJITHASHTU:

• Dita ndërkombëtare e grave, OKB: Femrat vazhdojnë të përballen me shumë pengesa
• Investimet e reja në Berat, Rama inspekton punimet në sheshin e qytetit