SHBA paraqet në Senat projektligjin që synon të ndalojë shtetësinë e dyfishtë

Në Senatin amerikan është paraqitur një projektligj që synon të ndalojë shtetësinë e dyfishtë dhe të vendosë parimin e besnikërisë ekskluzive ndaj shtetit amerikan. Nisma “Exclusive Citizenship Act of 2025” parashikon që qytetarët e SHBA-së nuk mund të mbajnë njëkohësisht shtetësi të një vendi tjetër.

Sipas projektligjit, çdo qytetar amerikan që, pas hyrjes në fuqi të ligjit, fiton vullnetarisht një shtetësi të huaj, do të konsiderohet automatikisht se ka hequr dorë nga shtetësia amerikane.

Ndërkohë, qytetarët që aktualisht posedojnë dy ose më shumë shtetësi do të kenë një afat prej një viti për të zgjedhur. Alternativat janë ose të heqin dorë nga shtetësia e huaj, ose nga ajo amerikane.

Mosrespektimi i këtij afati sjell humbjen automatike të shtetësisë amerikane. Autorët e nismës argumentojnë se shtetësia e dyfishtë mund të krijojë konflikte interesi dhe besnikëri të ndara, duke cenuar sipas tyre interesin kombëtar të Shteteve të Bashkuara.

Nëse miratohet, ligji do të shënonte një ndryshim të thellë në politikën amerikane të shtetësisë, me ndikim të drejtpërdrejtë për miliona qytetarë amerikanë në mbarë botën.