SHBA ‘përkulet’ para Macron, për herë parë me Biden në Shtëpinë e Bardhë

Presidenti francez Emmanuel Macron ka mbërritur në Uashington DC. Kjo është vizita e parë shtetërore i ftuar nga homologu Joe Biden.

Kjo vizitë do të jetë një ringjallje e shkëlqimit diplomatik, që ka qenë në pritje për shkak të pandemisë COVID-19.

Macron dhe Biden do të takohen në Shtëpinë e Bardhë të enjten.

“Nëse shikoni se çfarë po ndodh në Ukrainë, shikoni se çfarë po ndodh në Indo-Paqësorin dhe tensionet me Kinën. Franca është me të vërtetë në qendër të të gjitha atyre çështjeve  dhe Presidenti Macron ka qenë një udhëheqës dinamik brenda G-7, veçanërisht në Evropë. Dhe kështu, presidenti ndjeu se ky ishte pikërisht vendi i duhur dhe më i përshtatshëm për të filluar vizitat shtetërore”, u shpreh John Kirby, zëdhënës i Këshillit të Sigurisë Kombëtare të Shtëpisë së Bardhë.

Është një vizitë e rëndësishme nga aleati më i vjetër i Amerikës dhe Shtëpia e Bardhë prej ditësh ka bërë përgatitje për ardhjen e shefit të Elizesë.

“Unë dola vullnetare për të ndihmuar në dekorimin e Shtëpisë së Bardhë tre ditët e fundit. Presidenti francez Emmanuel Macron do të shohë dekorime kaq të bukura të Krishtlindjeve. Kishte shumë njerëz që erdhën nga të gjitha shtetet për të ndihmuar”, shprehet Ana, punonjëse.

Hera e fundit që Macron vizitoi Shtëpinë e Bardhë ishte në prill 2018 për t’u takuar me ish-presidentin Donald Trump. Të premten, Macron do të shkojë në New Orleans ku do të bëjë me dije planet për të zgjeruar programin për të mbështetur arsimin në gjuhën frënge në shkollat e SHBA.

LEXONI GJITHASHTU:

• Si Macron po lobon që Greqia ta njohë Kosovën?
• Përse Biden i kushton rëndësi Macron? Gazetari rendit arsyet