SHBA shqetësime për amnistinë, Escobar: Qeveria shqiptare të dëgjojë sugjerimet

Ndihmës Sekretari i Shtetit për Evropën dhe Euroazinë, Gabriel Escobar, që mbulon politikën amerikane për Ballkanin Perëndimor, në një intervistë për Zërin e Amerikës foli për amnistinë fiskale.

Zyrtari amerikan u shpreh se SHBA ka disa shqetësime të cilat i kanë diskutuar me qeverinë shqiptare bashkë me propozimet përkatëse.

“Po edhe ne kemi disa shqetësime. I kemi diskutuar ato me qeverinë e Shqipërisë. Do t’i bëja thirrje qeverisë së Shqipërisë t’i dëgjojë këto zëra dhe ta përshtatë qasjen ndaj amnistisë fiskale që të jetë në përputhje me standardet globale dhe me kërkesat e BE-së”, u shpreh Escobar për VOA.

Ministrja e Financave dhe Ekonomisë, Delina Ibrahimaj deklaroi se projektligji i amnistisë fiskale ka një listë shumë të gjatë të përjashtimeve të atyre individëve, të cilët nuk përfitojnë.

Në një intervistë për “Euronews Albania” pak kohë më parë, Ibrahimaj u shpreh se përmes kësaj liste, do të sigurohet që paratë e përfituara nga aktivitetet kriminale, të mos amnistohen.

Ibrahimaj tha se çdo person i cili kërkon të amnistojë paratë, duhet të aplikojë duke bërë një plotësuar një format vetëdeklarimi.

LEXONI GJITHASHTU:

• Sulmet e Ramës ndaj Kim, Escobar: Gjithçka që ajo bën është në linjë me DASH
• Berisha ‘non grata’, Escobar: Vendimi s’ishte politik, kemi partnerë të mirë në PD