SHBA sulmon Iranin/ Udhëheqësit evropianë bëjnë thirrje për përmbajtje dhe diplomaci

Pas sulmit të SHBA-ve ndaj objekteve bërthamore iraniane në  Fordo , Natanz dhe Isfahan, liderët europian kanë bërë thirrje për përmbajtje dhe diplomaci, ndërsa i kanë kërkuar Iranit të rikthehen në tryezën e bisedimeve.

Presidenti i Këshillit Evropian, Antonio Costa, ka kërkuar “respekt për të drejtën ndërkombëtare dhe sigurinë bërthamore” pas sulmeve të SHBA-së në uzinat bërthamore të Iranit.

“Diplomacia mbetet e vetmja mënyrë për të sjellë paqe dhe siguri në rajonin e Lindjes së Mesme. Shumë civilë do të jenë përsëri viktima të një përshkallëzimi të mëtejshëm”, tha ai, duke shtuar se është i alarmuar nga zhvillimet e fundit.

Presidentja e Komisionit Evropian, Ursula von der Leyen, tha se “stabiliteti duhet të jetë përparësi” dhe bëri thirrje që “Irani të angazhohet në një zgjidhje diplomatike të besueshme”.

“Tavolina e negociatave është i vetmi vend për t’i dhënë fund kësaj krize”, tha ajo.

Ndërkohë, kancelari gjerman Merz i bëri thirrje Iranit që të rifillojë menjëherë bisedimet bërthamore me SHBA-në, në mënyrë që të ketë një zgjidhje diplomatike, sipas një zëdhënësi të qeverisë gjermane.

Ministri i Jashtëm iranian është shprehur se Irani nuk ka si të rikthehet në tryezën e bisedimeve, pasi kurrë nuk është larguar, ndërsa akuzoi se ishte Izraeli dhe SHBA ata që “hodhën në erë diplomacinë”.

LEXONI GJITHASHTU:

• Britania përgatit një fluturim për të transportuar qytetarët e saj jashtë Izraelit
• Irani kërkon që IAEA të hetojë sulmet amerikane në centralet bërthamore