SHBA-të shesin naftën e parë venezueliane me vlerë 500 mln dollarë

Shtetet e Bashkuara të Amerikës kanë përfunduar shitjen e parë të naftës venezueliane, me vlerë 500 milionë dollarë (429 milionë euro), njoftoi sot një zyrtar i administratës së Presidentit të SHBA-së Donald Trump.

Detajet e shitjes nuk janë zbuluar ende, megjithëse zyrtari tha se priten më shumë shitje në ditët dhe javët në vijim, raporton CBS News.

Shtëpia e Bardhë ka zbuluar një strategji për të shitur miliona fuçi naftë të sanksionuar venezueliane dhe për të kontrolluar të ardhurat, duke u mbështetur në investimet nga kompanitë amerikane të naftës për të ringjallur infrastrukturën e naftës së vendit.

Të ardhurat nga shitjet e naftës do të ndahen midis venezuelanëve, kompanive amerikane dhe qeverisë amerikane, sipas gjykimit të qeverisë federale, tha më parë Shtëpia e Bardhë.

Trump njoftoi se SHBA-të do të shesin 30 deri në 50 milionë fuçi naftë venezueliane, në partneritet me kompanitë amerikane.

Ai u takua me drejtuesit më të lartë të kompanive amerikane të naftës në Shtëpinë e Bardhë javën e kaluar për të diskutuar nevojat dhe shqetësimet e tyre, si dhe investimet e mundshme në Venezuelë.

Në atë takim, drejtori ekzekutiv i ExxonMobil, Darren Woods, i tha Trump se asetet e kompanisë së tij ishin sekuestruar gjatë dy valëve të mëparshme të shtetëzimit në Venezuelë dhe se rihyrja në treg për herë të tretë do të “kërkonte disa ndryshime mjaft domethënëse” nga ajo që është “parë historikisht” në atë vend, “dhe cila është situata aktuale”.