Shefi i NATO-s takohet më Trump në Florida, zbardhet fokusi i bisedës

Shefi i NATO-s, Mark Rutte, është takuar në Florida me presidentin e zgjedhur amerikan, Donald Trump, për të diskutuar “çështjet e sigurisë globale që përbëjnë sfida për aleancën,” njoftoi një zëdhënëse e NATO-s. Takimi u mbajt të premten në Palm Beach dhe kishte si fokus kërcënimet aktuale ndaj sigurisë ndërkombëtare.

Gjatë mandatit të tij të parë si president, Trump ka kërkuar që vendet evropiane të rrisin buxhetet për mbrojtje, në përputhje me angazhimet e tyre ndaj NATO-s. Mark Rutte, ish-kryeministër i Holandës, shprehu dëshirën për ta takuar Trumpin menjëherë pas zgjedhjeve presidenciale të 5 nëntorit, për të diskutuar rritjen e rrezikut nga bashkëpunimi mes Koresë së Veriut dhe Rusisë.

Në një takim të fundit me liderët evropianë në Budapest, Rutte theksoi se Koreja e Veriut, Irani, Kina dhe Rusia po forcojnë gjithnjë e më shumë lidhjet mes tyre, veçanërisht në luftën kundër Ukrainës. Ai vuri në dukje se Rusia po mbështet Korenë e Veriut me teknologji ushtarake, një praktikë që, sipas tij, përbën një kërcënim për Shtetet e Bashkuara dhe Evropën.

Rutte ka qenë një nga liderët evropianë me marrëdhënie të mira me Trump gjatë mandatit të tij të parë presidencial nga 2017 deri në 2021, duke ndarë një qëndrim të përbashkët për të forcuar sigurinë e NATO-s.

LEXONI GJITHASHTU:

• Reuters: Putin i hapur të negociojë me Trump për armëpushim në Ukrainë
• Putin paralajmëron SHBA-në me një doktrinë të re bërthamore