Shifrat/ Tregu i sigurimeve mbyll 2024 me 22 mld lekë arkëtime

Kompanitë e sigurimeve kanë arkëtuar këtë vit 22 mld lekë, nga kontratat e makinave, pronave dhe shëndetit. Në raport me vitin e kaluar, ky treg është zgjeruar me 10%.

Siguracioni i makinave u ka kushtuar shqiptarëve, 13.4 mld lekë deri në muajin nëntor. Shuma që kanë mbledhur kompanitë e sigurimit është 8% më e lartë se ajo e vitit të kaluar.

Edhe sigurimi i jetës dhe pronës kanë njohur rritje në vlerë dhe në total bashkë me policat e detyrueshme të makinave, janë 22 mld lekë të grumbulluara gjithësej.

Shoqëritë e sigurimeve regjistrojnë këtë vit, 1 440 000 kontrata, me një rritje rreth 10% në raport me vitin e kaluar, falë edhe shtimit të mjeteve të cilat janë hedhur në qarkullim në vendin tonë këtë vit.

Nga ana tjetër, edhe dëmshpërblimet që morën individët u rritën në vlerë, ku vetëm ato për dëmet nga aksidentet me makina ishin 5.7 mld lekë.

Në vendin tonë sigurimi është i detyrueshëm për mjetet motorike, ndërsa për shëndetin dhe pronat zgjedhja është vullnetare. Tek këto të fundit, interes ka pasur kryesisht për sigurimin e pronave, nxitur edhe nga frika e tërmetit, zjarrit apo përmbytjeve.

Sipas strukturës, sigurimi i jetës dhe shëndetit zë vetëm 8% të tregut ndërsa makinat dhe pronat dominojnë me 92% të vëllimit.

LEXONI GJITHASHTU:

• Edhe malet do shiten “1 euro”, pronat shtetërore drejt privatizimit
• Testohet regjistrimi i emigrantëve, Celibashi: Platforma ofron siguri të plotë