Shiten brenda dy orësh biletat për Finalisiman Spanjë–Argjentinë në Lusail

Të gjitha biletat për ndeshjen Finalisima mes Spanjës dhe Argjentinës janë shitur plotësisht. 88.966 biletat e nxjerra në shitje u siguruan nga tifozët brenda vetëm dy orësh, duke konfirmuar interesin e jashtëzakonshëm për përballjen mes kampionëve të Evropës dhe Amerikës së Jugut.

Sfida do të zhvillohet në stadiumin “Lusail” në Katar, impianti madhështor që priti finalen e Kupës së Botës 2022. Pikërisht në këtë arenë, më 18 dhjetor 2022, Lionel Messi ngriti trofeun e Botës me Argjentinën pas finales dramatike ndaj Francës.

Edhe pse Finalisima nuk është një kompeticion zyrtar si Kupa e Botës, por organizohet bashkërisht nga UEFA dhe CONMEBOL, atmosfera e krijuar rreth saj është e krahasueshme me atë të një finaleje të madhe ndërkombëtare, duke gjeneruar emocione të forta te tifozët.

Katari po përjeton ditë entuziazmi të lartë në prag të vizitës së dy prej përfaqësueseve më të forta dhe më karizmatike në botë. Spanja, kampione në fuqi e Evropës, dhe Argjentina, kampione e botës dhe e Kupës së Amerikës, do të përballen më pak se tre muaj përpara nisjes së Kupës së Botës 2026, në një duel që pritet të shërbejë si një provë e madhe force për të dyja ekipet.