Shiu përmbyt Durrësin, qytetarët: Kjo situatë përsëritet sa herë ka reshje

Një rebesh shiu për pak minuta mjaftoi që rrugët e Durrësit të përmbyteshin. Qytetarët tregojnë se kjo situatë ndodh sa herë ka reshje, ndërsa nga pushteti vendor nuk është marrë asnjë masë.

Stuhia e fortë, e shoqëruar nga rrebeshe dhe era e fuqishme, shkaktoi përmbytjen e shumë rrugëve.

Situata më problematike u paraqit në akset rrugore të lagjes nr.18, zona afër stadiumit “Niko Dovana”, në qendër të qytetit, në rrugën “Taulantia”, në lagjen nr.1, në Shkozet e Plazh.

Kështu, rritja e nivelit të ujit në rrugë vështirësoi lëvizjen e këmbësorëve dhe qarkullimin e automjeteve.

Për qytetarët, kjo është tashmë një panoramë mëse normale.

“Durrësi historikisht është përmbytur nga shiu”, tha për Euroneës Albania një burrë.

Si shkaqe, qytetarët numërojnë dy.

“Nuk kanë bërë kanalizime, e para kjo. E dyta, edhe ato që janë, nuk i pastrojnë, t’i mirëmbajnë”, tha më tej ai.

“A e ke parë atë filmin ‘Bashkia e P…?’”, shtoi ai.

“Ai mendonte, që të punonin të gjithë nga 1 vit. E bëre ti këtë herë punën? Nuk doli sakllam, pas teje vij e bëj unë e prapë e saktë nuk del”, tha më tej ky burrë.

Kjo situatë përsëritet vit pas viti në qytetin bregdetar, por deri më tani ende nuk ka asnjë ndërhyrje nga pushteti vendor.

LEXONI GJITHASHTU:

• 5 minuta shi përmbyt Durrësin
• Moti i keq në Durrës, reshjet e shiut shkaktojnë përmbytjen e rrugëve