Shkarkohen drejtori i policisë së Lezhës dhe shefat e komisariateve në Dibër dhe Kamëz

Drejtoria e Standardeve Profesionale në DPPSH këtë të hënë ka kryer vlerësimet për performancën të drejtuesve të policive vendore ku ka krye disa shkarkime dhe emërime të reja.

Pas vlerësimit të performancës, drejtori i Përgjithshëm i Policisë së Shtetit, Ilir Proda ka firmosur mesditën e sotme shkarkimin nga detyra të Drejtorit të Drejtorisë Vendore Lezhë, Drejtues Altin Mena dhe të zv.drejtorit për Rendin, Kryekomisar Taulant Gjoka.

Mena është emëruar zëvendësdrejtor për Sigurinë Publike në DVP Kukës. Ndërsa Gjoka është emëruar shef i Sektorit të Sigurisë Publike në DVP Shkodër.

 Sipas njoftimit shkarkimet kanë ardhur me motivacionin për performancë të dobët. Ndërkohë ka komanduar në detyrën e Drejtorit të DVP Lezhë, zv/drejtorin për Hetimin e Krimit, në DVP drejtues Kujtim Gjoka.

Po me të njëjtin motivacionin janë shkarkuar nga detyra Shefi i Komisariatit të Policisë Dibër, Mariglen Duçi dhe shefi i Komisariatit të Policisë Kamëz, Besmir Dervishi.

Duçi u emërua shef i Sektorit për Hetimin e Krimeve në Kukës ndërsa Dervishi, shef i Seksionit të Krimeve ndaj Pronës në DVP Tiranë.