Shkon në 18 numri i viktimave nga përmbytjet në Iran

Numri i viktimave nga përmbytjet për shkak të reshjeve intensive që prekën zonat pranë Teheranit, në Iran, është rritur në 18, raporton Anadolia.

Shefi i Shtabit Kombëtar të Krizave, Hasan Nami, tha në një deklaratë në televizionin shtetëror se një person u vra në fshatin Veskare, në lindje të Teheranit dhe 14 automjete mbetën nën ujë.

Më e rëndë është situata në fshatin Merzdaran, ku janë përmbytur disa shtëpi, si dhe ka pasur edhe rrëshqitje dheu.

Nami tha se deri më tani janë vrarë 6 persona, ndërsa operacionet e shpëtimit janë në zhvillim e sipër.

Në fshatin Imamzade Davud, në veriperëndim të Teheranit, u gjetën edhe dy trupa të tjerë, njoftoi Agjencia iraniane e Lajmeve Studentore (ISNA).

Numri i viktimave në fshatin Imamzade Davud është rritur në tetë, dhe vazhdon kërkimi për 19 persona të zhdukur.

Autoritetet iraniane shtuan se 700 banorë janë evakuuar dhe zona po pastrohet.