Evropa u përball me rrezikun e një katastrofe radioaktive pasi centrali bërthamor i Zaporizhias, i kontrolluar nga Rusët, u shkëput nga rrjeti energjetik ukrainas.

Një zjarr që ra në afërsi të perimetrit të impiantit dëmtoi linjat elektrike të rrjetit dhe bëri që të fikeshin dy reaktorë.

“Sot, për herë të parë në histori, impianti në Zaporizhia ndaloi dhe struktura mbrojtëse e njësive të energjisë u aktivizua pasi bombardimet ruse dëmtuan linjën e fundit operative të centralit, që ishte e lidhur me sistemin energjetik të Ukrainës. Gjeneratorët me dizel filluan menjëherë nga puna. Bota duhet ta kuptojë se çfarë kërcënimi është ky. Nëse gjeneratorët nuk do të ishin ndezur, nëse aparaturat dhe stafi ynë nuk do të kishte punuar pas ndërprerjes së energjisë, tani do të vuanim pasojat e një emergjence radioaktive”, tha Zelensky.

Moska dhe Kievi fajësojnë njëra-tjetrën për situatën në centralin e Zaporizhias, ku vizita e inspektorëve të Agjencisë Ndërkombëtare për Energjinë Atomike mund të ndodhë në ditët e ardhshme.

Kompleksi bërthamor, më i madhi në Evropë, është pushtuar nga forcat ruse që mbajnë nën kontroll punonjësit ukrainas që nga ditët e para të konfliktit.

LEXONI GJITHASHTU:

• Europa shpëtoi për një fije nga rrezatimi bërthamor, thotë Zelensky
• Putin jep dritën e gjelbër për misionin e OKB-së në impiantin e Zaporizhias