Shmanget sulmi terrorist në Francë, goditja gjatë dorëzimit të flakës olimpike

Një person është arrestuar në Francë nën dyshimin se kishte planifikuar një sulm gjatë dorëzimit të pishtarit olimpik në qytetin e Bordosë.

Sipas prokurorëve francezë, i dyshuari kishte shkruar në rrjetet sociale një mesazh shqetësues se mund të kryente një krim duke kopjuar stilin e masakrave amerikane.

Pishtari olimpik mbërriti në Marsejë më herët gjatë muajit, pak kohë përpara Lojërave Olimpike të Parisit që nisin më 26 korrik.

Organizatorët e eventit sportiv kanë folur më herët për një operacion sigurie me përmasa të paprecedenta për ceremoninë e hapjes, ku do të marrin pjesë mbi 10 mijë atletë të vendosur përgjatë lumit të Senës.

Flaka olimpike pritej të arrinte në Bordo mesditën e së enjtes, pas një seri eventesh që shënuan kalimin e saj në zonat përreth.

Prokurori i qytetit deklaroi se hetimet mbi të dyshuarin nisën pas mesazhit të tij online, që i referohej vrasjes së 6 të rinjve 10 vjet më parë në Isla Vista të Kalifornisë.

Hetuesit e identifikuan atë me emrin Alex G, i cili nuk kishte precedentë kriminalë. Megjithatë, në banesën e tij, policia gjeti një revolver prej gome, si dhe telefona të shumtë celularë dhe një kompjuter.

I marrë në pyetje, i dyshuari pranoi se kishte menduar kryerjen e një akti kriminal. Autoritetet shtuan se gjendja e tij psikologjike ishte “shumë e brishtë”.