Shpërblimi për pensionistët nga taksa e HEC private, shuma në diskutim

Taksa e rritur e prodhuesve të energjisë pritet të shkojë si bonus për pensionistët, por mënyra se si do të ndahet është ende në diskutim.

Për moshën e tretë, do të ketë shtesë në pensione deri në 7%, aq sa është edhe niveli i inflacionit.

“Kemi të parashikuar në buxhet për këtë vit një fond që i dedikohet mbështetjes sociale, po punojmë për rritjen e pagave dhe synojmë të rriten jo vetëm për administratë publike, por edhe në sektorin privat. Sa i përket pensioneve, kemi një politikë të indeksuar për indeksimin në bazë të inflacionit. Gjatë vitit të shkuar u indeksuan 2 herë, do vijomë me këtë praktikë që efektet e krizës të mos ndikojnë tek pensionistët. Nuk kemi përcaktuar ende një politikë për dhënien e një shpërblim në muajin prill”, tha ministrja e Ekonomisë Delina Ibrahimaj.

Ministrja foli edhe për politikën e pagave, të cilat do të vazhdojnë të rriten, dhe për këtë mori si referencë edhe vendimin për rritjen e pagës minimale.

695 mijë pensionistë morën 8000 lekë bonus në muajin janar, si ndihmë për të të përballuar rritjen e çmimeve, dhe një paketë e dytë shpërblimi u lajmërua nga kryeministri Rama në pjesën e parë të këtij vitit 2023.

LEXONI GJITHASHTU:

• Pensionistët: Ilaçet i blejmë, s’na bëjnë efekt ato që na jep mjeku me rimbursim
• Luarasi: Tirana qytet i mirë për të jetuar por nuk ofron shume për pensionistët