Shpërthimi vrau 67-vjeçarin, gazetari jep detaje nga Gjykata e Shkodrës: Gerti Bushati vendosi lëndën plasëse

Gazetari i Euronews Albania, Teodor Gjerga në një lidhje live nga Gjykata e shkallës së parë Shkodër ka dhënë detaje të reja lidhur me 4 personat e arrestuar për shpërthimin me eksploziv që i mori jetën  Hysni Ymerit.

Gazetari bën me dije se 4 të arrestuarit Gerti Bushati, Ergys Ibrahimi, Edison Hasaj dhe Gjergji Zefi pritet të njihen me masën e sigurisë. Ai thekson se është zbardhur roli i Bushatit i cili ka vendosur lëndën plasëse dy ditë para ngjarjes që i mori jetën 67-vjeçarit.

Gjerga shton se ndaj 4 të arrestuarve rëndojnë akuzat vrasje me paramendime  e kryer në bashkëpunim, shkatërrim i pronës me eksploziv, mbajta pa leje dhe prodhimi i armeve shpërthyese dhe i municionit. Gjithashtu ndaj tyre rëndojnë akuzat për prodhim dhe shitje e narkotikëve në bashkëpunim si dhe prishje e qetësisë publike.

“Sipas hetimeve deri në këto momente, 4 personat kanë indicie që janë të përfshirë në këtë ngjarje të rëndë. Policia e Shkodrës ka provuar se Gerti Bushatii dy ditë para se të ndodhte ngjarja ka vendosur lëndën plasëse ne aparatin e matësve elektrike dhe më pas është larguar duke ndryshuar veshjen e tij.

I gjithë ky veprim është dokumentuar nga polica e Shkodrës. Pritet të zbulohet edhe roli i tre personave të tjerë të cilët edhe pas vendosjes së përgjuesve zonal dhe ambiental në ambientet e komisariatit të Shkodrës  ka rezultuar se janë të përfshirë në këtë ngjarje të rëndë”, tha ai.