Shpëtohen 100 persona nga uzina Azovstal, 100 mijë të bllokuar në Mariupol

Autoritetet ukrainase shprehen se pas evakuimit të pjesshëm të civilëve nga uzina e çelikut kanë vijuar bombardimet e pjesshme ruse në qytetin port  të Mariupol.

Një ditë më parë Ministria ruse e Mbrojtjes publikoi pamje kur një pjesë e civilëve po evakuoheshin. Në të tjera imazhe tregohet se 100 persona u ndihmuan të largoheshin nga strehimoret e tyre nëntokësore.

Pas disa javësh në rrethim dhe të bllokuar, gra, fëmijë burra u larguan përmes një autobusi. Pasi arritën të shpëtonin shumë prej tyre rrëfejnë momentet  e vështira.

“Fëmijët kërkonin ushqim gjatë të gjithë kohës, të rriturit mund ta duronin më mirë urinë”, shprehet një e evakuuar.

“Ushtarët e Azov, erdhën në bunkerin tonë dhe thanë se po kërkonin apartamente. Ata bërtitën, duke pretenduar se pjesa më e madhe e qytetit ishte pro-ruse. Ata na thanë se kishin hyrë në shumë apartamente dhe kishin parë pothuajse në të gjitha vendet, flamurin rus. Për të qenë e sinqertë, unë nuk kisha një flamur rus në banesën time, as ukrainas”, rrëfen një tjetër banore.

Presidenti Zelenski falënderoi OKB-në dhe Kryqin e Kuq për ndihmën në organizimin e evakuimit.

“Sot më në fund arritëm të fillojmë evakuimin e njerëzve nga Azovstal. Pas shumë javësh negociata, pas shumë përpjekjesh, takime të ndryshme, thirrje, propozime. Nuk kishte asnjë ditë të vetme që të mos përpiqeshim të gjenim një zgjidhje që do të shpëtonte njerëzit tanë”, u shpreh presidenti.

Rreth 100.000 njerëz ende besohet të jenë të bllokuar në Mariupol, duke përfshirë 1000 civilë dhe rreth 2000 luftëtarë ukrainas që ndodhen në fabrikën e çelikut të epokës sovjetike.

LEXONI GJITHASHTU:

• Nis evakuimi i civilëve nga Mariupol përmes ndërhyrjes së OKB-së
• Mbi 3 mijë civilë ukrainas të bllokuar në uzinën e çelikut në Mariupol