Shpresa Rupar tregon disa mënyra si të menaxhoni shqetësimet gjatë COVID-19

Shpresa Rupar, trajnere e programit neuro-linguistik thotë se mënyra më e mirë për të menaxhuar shqetësimet në këtë periudhë pandemie të COVID-19 është fokusimi në çështje jashtë coronavirus.

Pavarësisht se shumë persona po përjetojnë shqetësime psikologjike gjatë kësaj periudhë, znj. Rupar nënvizon se, ata nuk u drejtohen psikologëve për shkak se ndihen të pasigurt për të nesërmen.

“Nuk mund të them se janë shtuar se tani është problemi tjetër, frikë nga e nesërmja. Në vende si Shqipëria dhe Sllovenia ekziston dhe problemi financiar. Jemi të pasigurt pasi na është shkundur siguria personale të gjithëve”, shprehet ajo.

Trajnerja ndërkombëtare neuro-linguistike tha më tej se, në kohë krize nevojitet për të ndryshuar diçka dhe për këtë arsye individët duhet të përmirësojnë më tej veten. Ndërsa në planin e përgjithshëm ndoshta nevojitet të investohet më shumë në fushën e kërkimeve.