‘Shqipëria do të jetë kampione absolute e turizmit në Ballkan’, Rama tregon për gazetaren Ilva Tare objektivat e 4 viteve të ardhshme

Kryeministri Edi Rama, i pyetur nga gazetarja Ilva Tare nëse si politikan prej 23 vitesh ndihet përgjegjës për Shqipërinë që është sot, u përgjigj se ka të gjithë përgjegjësinë dhe krenarinë për çfarë është bërë në 8 vjet, kohë në të cilën siç tha ka bërë më shumë kushdo tjetër.

Sipas tij, qeveria e majtë ka vendosur bazat për t’u ngjitur më lart dhe për të krijuar bazat e një shteti që mund të jetë shtëpia e përbashkët për të gjithë shqiptarët.

I pyetur nga gazetarja Ilva Tare se çfarë është më lart pas këtyre 8 viteve të tij në pushtet, kreu i qeverisë u shpreh se gjithçka sot është më lart se 8 vjet më parë dhe do të jetë edhe më lart nëse PS qëndron në pushtet 4 vite në vazhdim.

Z. Rama u shpreh se vizioni i tij është që Shqipëria të bëhet një kampione absolute në fushën e turizmit dhe agroturizmit.

“Më lart nga këtu e shoh Shqipërinë  kampione absolute të turizmit në Ballkan brenda 4 viteve të ardhme, kampione në agroturizëm. Po flas për nivel kampioni. Ajo që do bëjmë ne në 4 vitet e ardhme është që ta fusim Shqipërinë në Champions Legue e turizmit të Evropës në kuptimin e të ardhurave për frymë që do të prodhojë nga turizmi, për energjinë do të jemi kampion në Ballkan”, tha kreu i qeverisë.