Shtëpitë botuese të bashkëpunojnë për Abetaren e përbashkët, thotë profesor Rrokaj

Shezai Rrokaj, autor i Abetares së përbashkët deklaroi se shtëpitë botuese duhet të bashkëpunojnë në pikëpamjen e metodologjisë për krijimin e Abetares së përbashkët.

Sipas tij Abetaret që janë aktualisht janë të punuara mirë, por gjithnjë ka vend për përmirësim, andaj mendon se vendimi është korrekt, por koha në dispozicion nuk është e mjaftueshme.

“Për t’u unifikuar unë mendoj, shtëpitë botuese me përvojën më të madhe sot në fushën e tekstologjisë, përkatësisht dhe të Abetares bashkë me autorët duhet të mblidhen dhe të vendosin se si mund të realizohet një tekst që të ketë pritshmërinë e kohës, të fëmijëve, të shkollës, por natyrisht edhe të faktorit politik,” u shpreh Rrokaj.

Që prej vitit 2012, që kur modeli i Abetares së përbashkët u vu në zbatim, në Kosovë ka vetëm një Abetare, ndërsa në Shqipëri ka 3 për shkak të ligjit të altertekstit, që mundëson disa alternativa për nxënësit.

Profesori theksoi se duhen marrë përvojat e disa shtëpive botuese që mund të jenë të dobishme për një prodhim më të mirë.

LEXONI GJITHASHTU:

• Abetarja e përbashkët Shqipëri-Kosovë, një hap para në 10 vite pas
• Ministrja e Arsimit: Të gjithë nxënësit e klasës së parë do të kenë të njëjtin tekst të Abetares
• ‘Shqipëria s’ka respektuar abetaren e unifikuar, Kosova po’, thotë ministrja Nagavci