Shtetet e Evropës Qendrore kërkojnë që Bosnjës t’i jepet statusi i kandidatit

Pesë shtete të Evropës Qendrore, që të gjitha anëtare të Bashkimit Evropian, i bënë thirrje bllokut që t’i japë statusin e shtetit kandidat Bosnje Hercegovinës.

“Bëhet fjalë për një sinjal nga qeveritë tona se Ballkani Perëndimor është i rëndësishëm për BE-në”, tha më 13 korrik në Budapest, ministri i Jashtëm i Austrisë, Alexander Schallenberg.

Ministrat e Jashtëm të grupit të quajtur C5 – Austria, Hungaria, Republika Çeke, Sllovakia dhe Sllovenia – kërkuan që në samitin e radhës së BE-së, që do të mbahet në tetor, çështja e statusit kandidat për Bosnjë e Hercegovinën të jetë në agjendë, raporton Radio Evropa e Lirë.

Në qershor, Ukraina dhe Moldavia morën statusin e vendit kandidat për anëtarësim në BE.

Bosnjë e Hercegovina, shtet që ende vuan nga efektet e luftës së viteve 1992-95, nuk u përfshi në marrjen e statusit gjatë samitit të qershorit.

LEXONI GJITHASHTU:

• Brenda vitit do të aplikojmë për statusin e vendit kandidat në BE, thotë Kurti