Shtyhet sërish procesi gjyqësor për ekstradimin e turkut Farul Fetih Ozer.

Në seancën e sotme në qytetin e Elbasanit, prokurori paraqiti prova të reja në proces,  ndërkohë që avokati kërkoi kohë të njihet edhe me provat e reja.

Në seancën e sotme pati shumë debate dhe avokati mbrojtës i turkut u shpreh se ka një tendencë që kjo gjykatë të marrë një vendim sa më shpejt për klientin e tij.

“Nuk e kuptoj pse gjithë ky ngut, ndërkohë ne jemi këtu për të plotësuar të gjitha të drejtat e ligjshme të personit që unë kam në mbrojtje”, u shpreh avokati Klodian Skënderi.

Procesi gjyqësor i radhës pritet të zhvillohet në 10 nëntor, ora 12:00.

Turku dyshohet se u fsheh për gati 1 vit në Shqipëri, deri kur u arrestua në një resort në bregdetin e jugut pak javë më parë.

Ozer u arrestua nga njësia speciale “FAST” për kapjen e personave në kërkim ndërkombëtar, pasi mbi të rëndon akuza “mashtrim me kriptovalutat”.

LEXONI GJITHASHTU:

• Shtyhet gjyqi për ekstradimin e turkut të kriptovalutave
• Turqia kërkon ekstradimin e “bosit të kriptomonedhave”