Shtyhet pakti i armëpushimit, Izraeli vazhdon sulmet tokësore dhe ajrore në Gaza

Pritja për lirimin e pengjeve vazhdon. Një zyrtar izraelit njoftoi se shkëmbimi i planifikuar i disa të burgosurve palestinezë me 50 pengje izraelite në Gaza është shtyrë për ditën e premte. Gjithashtu ekzistojnë dyshime nëse armëpushimi i premtuar në kuadër të marrëveshjes dypalëshe do të nisë.

Mbrëmjen e së mërkurës, kryeministri Benjamin Netanyahu, i shoqëruar nga anëtarë të tjerë të qeverisë së tij, u përpoq të garantonte opinionin publik se marrëveshja për pengjet ishte vendimi i duhur.

 “Operacionet ushtarake për kthimin e pengjeve jo gjithmonë janë të mundura. Ne nuk po presim, por po përfitojmë nga çdo mundësi që krijohet për lirimin e pengjeve tona. Sepse kthimi i tyre është një mision i shenjtë. Ushtria dhe agjencitë e sigurisë e mbështesin akordin”,-tha Benjamin Netanyahu, kryeministër i Izraelit.

Deri në zbatimin e marrëveshjes, Izraeli ka vijuar operacionet e tij tokësore dhe ajrore në Gaza, të shkaktuara nga sulmi i 7 tetorit nga Hamasi, që vrau 1.200 persona. Netanyahu është zotuar se do të arrijë një “fitore absolute”.

Nga ana tjetër, Ministria e Shëndetësisë në Gaza deklaron se mbi 14 mijë persona, përfshirë mbi 5 mijë fëmijë, janë vrarë gjatë fushatës izraelite.

LEXONI GJITHASHTU:

• “Gaza drejt armëpushimit”- Hamasi njofton se palët janë pranë akordit, Izraeli hesht
• Palestinezët e evakuuar nga Gaza lejohen të hyjnë në Bosnjë