Shtyhet votimi për anëtarët e këshillit të RTSH, mazhoranca kërkon më shumë kohë

Votimi për dy anëtarët e rinj të këshillit drejtues të RTSH është shtyrë për javën e ardhshme.

Ndonëse votimi i Albert Mingas dhe Edmond Tullumanit ishte parashikuar të bëhej në seancën plenare të kësaj të enjte, ishte mazhoranca socialiste ajo që kërkoi shtyrjen për votimin e kandidaturave, me argumentin se u nevojitej më shumë kohë për shqyrtimin e këtyre dy emrave. Kjo kërkesë është pranuar edhe nga opozita.

Edmond Tullumani dhe Albert Minga do të zëvendësojnë Petrit Rukën i cili u nda nga jeta më 6 korrik të 2021-shit, dhe Thanas Gogën që ka dhënë dorëheqjen, i propozuar nga opozita.

Shpallja e dy vendeve vakante në mars të këtij viti ka sjellë debate në komisionin për Edukimin dhe Mjetet e Informimit Publik mes mazhorancës dhe opozitës.

Kjo e fundit ka kërkuar që dy anëtarët e rinj të këshillit drejtues të RTSH t’i lihen opozitës, për shkak të mungesës së përfaqësimit në kuvend në legjislaturën e shkuar, por kanë hasur në kundërshtinë e socialistëve të cilët kërkuan që ndarja të bëhej e barabartë.

Në maj 2021 u plotësuan katër vakanca, të zgjedhura në një parlament të dominuar nga mazhoranca socialiste dhe një opozitë parlamentare e kontestuar pas largimit të PD-së nga Kuvendi.

Më herët opozita ka shfaqur rezerva sa i përket funksionimit të Këshillit drejtues të RTSH, pasi institucioni sipas tyre përfaqësohet vetëm nga mazhoranca socialiste në një kohë që duhet të jetë larg ndikimeve politike.

LEXONI GJITHASHTU:

• Lirohet nga burgu ish-drejtori i RTSH-së
• GJKKO dënon me 1 vit e 4 muaj burg ish-drejtorin e RTSH, Thoma Gëllçi