Si ra në pranga efektivi i Operacionales, veprimet gjatë shkëmbimit të kokainës

Hetimet për përplasjen e policisë me një grup trafikantësh, mbrëmjen e së enjtes, zbuluan edhe rolin aktiv të një punonjësi policie në tregtinë e drogës. Ervis Shkurta efektiv në Drejtorinë e Forcës së Posaçme Operacionale pranë Drejtorisë së Përgjithshme të Policisë së Shtetit u vu në pranga nga Agjencia e Mbikqyrjes Policore.

Ai rezulton me lidhje të ngushtë shoqërore me njërin prej personave të arrestuar, ka qenë pjesë aktive e sigurimit të kushteve për tregtimin e 1 kg e dyshuar kokainë, si dhe ka patur dijeni të plotë për personat dhe vendin ku do ndodhte shkëmbimi i lëndës narkotike.

Sipas burimeve ka qenë zbërthimi i celularëve të personave të arrestuar që ka zbuluar rolin e punonjësit operacional të policisë në trafikun e drogës.

Sipas të dhënave ai ka përdorur një nr. anglez për të komunikuar për blerjen e drogës dhe në momentin e ndërhyrjes së policisë ka qënë i pranishëm në zonë duke lajmëruar të largoheshin disa persona të tjerë.

Gjatë operacionit të së enjtes, policia plagosi Eneo Sulejmanaj i cili nuk iu bind urdhrave të policisë për të ndaluar duke rrezikuar jetën e agjentëve të antidrogës, ndërsa në makinën ku ndodheshin edhe Shkëlqim Ostreni dhe Igli Begaj u gjet 1 kg kokainë e presuar me mbishkrimin AP.