Situatë çnjerëzore në Gaza, OBSH: Banorët, pre e shkatërrimit dhe kequshqimit

Situata shëndetësore dhe humanitare në Gaza është çnjerëzore dhe vazhdon të përkeqësohet.

Deklarata është bërë nga kreu i Organizatës Botërore të Shëndetësisë. Izraeli vijon të bombardojë zonën dhe 67 palestinezë u vranë vetëm të mërkurën, sipas lëvizjes së Hamasit. Shefi i OBSH-së e ka përshkruar Gazën si “një zonë e vdekur me territorin e shkatërruar”.

“Mbi 29 mijë persona kanë vdekur. Shumë prej tyre janë zhdukur dhe supozohen të vdekur dhe shumë të tjerë janë plagosur. Kequshqimi është rritur ndjeshëm që nga fillimi i luftës, nga nën 1 për qind që ishte në mbi 15 për qind në disa zona”, tha Tedros Adhanom Ghebreyesus, drejtor i përgjithshëm i OBSH-së.

Ndërsa thirrjet ndërkombëtare për një armëpushim rriten dhe qeveritë tentojnë të sigurojnë një paqe afatgjatë, qeveria izraelite ka votuar të mbështesë kundërshtimin e kryeministrit Netanyahu ndaj krijimit të shtetit palestinez.

“Populli i Izraelit dhe përfaqësuesit e zgjedhur të tij janë të bashkuar si kurrë më parë. Parlamenti votoi me shumicë dërrmuese çdo përpjekje për të imponuar krijimin e shtetit palestinez ndaj Izraelit. Paqja do të arrihet vetëm kur të kemi mposhtur tërësisht Hamasin”, u shpreh Netanyahu.

Në planin e Izraelit për të arritur fitoren përfshihet shpëtimi i pengjeve të mbetura dhe pushtimi i Rafahut ku më shumë se gjysma e 2.3 milionë palestinezëve ka kërkuar strehim.

Uashingtoni vijon të paralajmërojë Izraelin se, nëse ushtria e tij nuk merr parasysh sigurinë e refugjatëve palestinezë, pushtimi i Rafahut do të rezultojë “një katastrofë”.

LEXONI GJITHASHTU:

• Gaza| Kina dënon veton e SHBA në OKB kundër një armëpushimi të menjëhershëm
• Lufta në Gaza, SHBA kërkon armëpushim të përkohshëm në propozimin në OKB