Lufta në Gaza, SHBA kërkon armëpushim të përkohshëm në propozimin në OKB

SHBA ka propozuar një projekt-rezolutë në Këshillin e Sigurimit të OKB-së, e cila kërkon një armëpushim të përkohshëm në Gaza.

Sipas mediave të huaja, SHBA gjithashtu ka paralajmëruar Izraelin kundër pushtimit të qytetit të mbipopulluar të Rafahut.

Shtetet e Bashkuara kanë shmangur më parë fjalën “armëpushim” gjatë votimeve në OKB për luftën, por presidenti Joe Biden ka bërë komente të ngjashme.

Megjithatë, SHBA planifikon të vërë veton në një projekt-rezolutë tjetër nga Algjeria, e cila kërkon një armëpushim të menjëhershëm humanitar.

Më shumë se një milion palestinezë të zhvendosur, të cilët përfaqësojnë rreth gjysmën e popullsisë së Gazës, janë grumbulluar në Rafah pasi janë detyruar të kërkojnë strehim atje.

Qyteti jugor, i cili kufizohet me Egjiptin, ishte shtëpia e vetëm 250,000 njerëzve para luftës.

Shumë nga të zhvendosurit jetojnë në strehimore të improvizuara ose tenda në kushte të mjerueshme, me qasje të pakët në ujë të pijshëm ose ushqim të sigurt.

OKB ka lëshuar paralajmërimin e vet se një ofensivë e planifikuar izraelite në qytet mund të çojë në një “masakër”.

Izraeli nisi operacionet e tij në Gaza pas një sulmi të armatosur të Hamasit në jug të Izraelit më 7 tetor, gjatë të cilit u vranë rreth 1200 njerëz dhe më shumë se 240 të tjerë u morën peng.

Fushata ushtarake izraelite ka vrarë 29,000 njerëz në territorin palestinez, sipas Ministrisë së Shëndetësisë të drejtuar nga Hamasi atje.

LEXONI GJITHASHTU:

• Lufta në Gaza, shkon në 68 numri i të vdekurve nga sulmet izraelite brenda 24 orëve
• Mijëra fëmijë në Gaza në rrezik nga kequshqyerja, UNICEF: U rrezikohet jeta