“S’kemi pajisje” Ish-kreu i ushtrisë britanike kundër dërgimit të trupave në Ukrainë

Ish-kreu i ushtrisë britanike, Lordi Richard Dannat, ka komentuar deklaratën e Kryeministrit Keir Starmer për të dërguar trupa britanike në Ukrainë, duke theksuar se një vendim i tillë do të kishte një kosto të konsiderueshme.

Në një intervistë për BBC Breakfast, Dannat u shpreh se Britania nuk ka trupat dhe pajisjet e nevojshme për ta bërë një gjë të tillë.

“Ne nuk kemi numrat dhe pajisjet për të dërguar një forcë të madhe ushtarake për një periudhë të gjatë kohore”. Ai shtoi se duhet të investohet në burime dhe trajnime për të realizuar një angazhim të tillë, duke theksuar se kryeministri është duke bërë atë që është e nevojshme, por deklaroi se ka një çmim për këtë.

Risku sipas ish-ushtarakut qëndron në faktin nëse Rusia thyen armëpushimin dhe sulmon sërish trupat paqëruajtëse që do të vendosen në Ukrainë.

Komentet e Lordit Dannat vijnë pas deklaratave të Starmer, i cili tha të dielën se është i gatshëm të dërgojë trupa britanike në Ukrainë si pjesë e një force paqeruajtëse, pas përfundimit të luftës, dhe për të kontribuar në një paqe të qëndrueshme për të parandaluar çdo mundësi për një agresion të mëtejshëm nga Rusia.

Starmer i bëri këto komente si pjesë e një nisme për të treguar se kombet evropiane duhet të kenë një rol më të madh në bisedimet për përfundimin e konfliktit në Ukrainë. Ai theksoi se nuk e ka marrë këtë vendim me lehtësi, por e konsideron të rëndësishme për të garantuar një paqe të qëndrueshme.

“Sigurimi i paqes në Ukrainë është thelbësor për të parandaluar agresionin e mëtejshëm të Putinit,” tha ai.

LEXONI GJITHASHTU:

• Zelensky: Ukraina nuk u ftua për bisedimet SHBA-Rusi në Arabinë Saudite
• Starmer: I gatshëm të vendos trupa në terren në Ukrainë për të mbrojtur paqen