Skena të shëmtuara dhune në derbin Partizani–Tirana U-18, finalja mbyllet me përleshje

Një shfaqje e shëmtuar ishte ajo që mbylli finalen e të rinjve të kryeqytetit në “Arenën e Demave”, e cila u përfshi nga skena të rënda dhune pas derbit mes Partizanit dhe Tiranës U-18, duke kaluar në plan të dytë vetë qëllimin kryesor të pjesëmarrjes, futbollin.

Më herët gjatë ndeshjes ishin akorduar tre kartonë të kuq, dy për Partizanin dhe një për Tiranën, çka kishte rritur tensionin në fushë. Konflikti shpërtheu pas vërshëllimës përfundimtare të arbitrit dhe degradoi shpejt në përplasje fizike mes futbollistëve.

Situata doli më pas plotësisht jashtë kontrollit, pasi në fushë hynë edhe tifozët, ndërsa dhuna u përshkallëzua me goditje dhe përplasje të forta. Forcat e policisë të pranishme në stadium, të cilat së bashku me punonjësit e sigurisë u përpoqën të ndanin futbollistët dhe personat e tjerë të përfshirë në përleshje.

Sai përket ndeshjes, ajo ishte e vlefshme për “Play Off”-in e kampionatit U-18 mes Partizanit dhe Tiranës dhe përfundoi me triumfin minimal 0-1 të bardhebluve, duke i dhënë Tiranës U-18 titullin kampion për këtë grupmoshë.

Dhuna dhe sjelljet e papërshtatshme janë kthyer në një fenomen shqetësues ku futbollistë, drejtues klubesh, stafesh dhe pjesëmarrës të tjerë në një ndeshje futbollistike mund të shkojnë në një ndeshje për çdo gjë, përveçse për lojën dhe futbollin jo, një shëmti e madhe që po përhapet si virus në futbollin shqiptar.