“S’kërkojmë pushtimin e Gazës”- Netanyahu: Cilat janë qëllimet tona

“Ne nuk po kërkojmë ta pushtojmë Gazën, apo ta qeverisim atë. Ajo që duhet të shohim në gaza është demilitarizimi, çrrënjosja e radikalizmit dhe rindërtimi”. Kështu ka deklaruar kryeministri izraelit Benjamin Netanyahu, pas takimit me familjen e një ushtari të vrarë.

Deklarata erdhi pak orë pasi Izraeli ra dakord të ofronte ndërprerje humanitare 4-orëshe të konfliktit në veri të Gazës, vendim ky i vlerësuar nga OKB dhe Shtetet e Bashkuara.

Më herët, një përfaqësues i Brigadave Al Kuds, krahu ushtarak i Xhihadit Islamik Palestinez, njoftoi se ishin gati të lironin dy pengje të tjera izraelite, një grua 77-vjeçare dhe një djalë 12 vjeç.

Në orët e vona të së enjtes, rebelët Huthi në Jemen deklaruan se kishin qëlluar një seri raketash balistike ndaj jugut të Izraelit, në veçanti në portin e Eilatit. Rebelët thanë se raketat i kishin goditur objektivat, ndërsa shteti hebre njoftoi se sistemet e tij kishin neutralizuar në ajër raketa të shumta mbi detin e Kuq.

Situata është gjithnjë e më e tensionuar në Bregun Perëndimor. Të enjten, forcat izraelite i dhanë jetë një sulmi të gjatë në qytetin e Jeninit, ku të paktën 14 palestinezë mbetën të vrarë dhe 20 të tjerë të plagosur.

LEXONI GJITHASHTU:

• Netanyahu: Nuk ka armëpushim derisa pengjet të lirohen
• Netanyahu: Izraeli do ketë përgjegjësi për sigurinë në Gazë pas luftës