Skica e rrallë e Michelangelos shitet për 23 milionë dollarë në SHBA

Një skicë e rrallë e këmbës nga Michelangelo është shitur për 23 milionë dollarë në ankand, duke thyer parashikimet dhe tejkaluar më shumë se 10 herë vlerësimin fillestar.

Ekspertët e konsiderojnë këtë skicë si vizatimin e këmbës së Sibilës Libiane, e cila më vonë u pikturua në tavanin e Kapelës Sistine në Vatikan. Sipas shtëpisë së ankandeve Christie’s, pronari i saj kishte dërguar vetëm një fotografi për vlerësim dhe më pas zbuluar vlerën e vërtetë të veprës.

Andrew Fletcher, drejtori global i Departamentit të Mjeshtrave të Vjetër në Christie’s, e përshkroi zbulimin si “një nga momentet më të paharrueshme” të karrierës së tij.

Skica e vogël me shkumës të kuq daton rreth viteve 1511–1512, periudhë kur Michelangelo po përgatitej për gjysmën e dytë të pikturës së tavanit të Kapelës Sistine, e cila përfshinte edhe Sibilën Libiane.

Pronari, i cili jeton në Bregun Perëndimor të SHBA-së, tha se kishte trashëguar vizatimin nga gjyshja e tij. Ai shpjegoi se vepra ishte ruajtur brez pas brezi në familje në Europë që nga fundi i viteve 1700, ndërsa identiteti i tij nuk është bërë publik.

Giada Damen, specialiste e Departamentit të Vizatimeve të Mjeshtrave të Vjetër në Christie’s, përdori reflektografi infra të kuqe për të zbuluar vizatime të tjera në pjesën e pasme të fletës, të cilat gjithashtu i ngjanin stilit të Michelangelos. Ajo krahasoi më pas këmbën me një vizatim të artistit në Muzeun Metropolitan, duke konfirmuar origjinalitetin e skicës.