Sonila Bejtja betohet si anëtare e shtatë e Gjykatës Kushtetuese

Një ditë pas dekretimit nga presidenti Ilir Meta juristja Sonila Bejtja është betuar si anëtare e shtatë e Gjykatës Kushtetuese.

Pas ekzekutimit të himnit kombëtar dhe leximit të dekretit përkatës të emërimit të saj nga Kreu i Shtetit, Sonila Bejtja u betua para Presidentit Meta: “Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë”.

Gjykata Kushtetuese pas një periudhe 3-vjeçare jashtë funksionit arriti kuorumin e nevojshëm prej 6 anëtarësh pak ditë më parë, ndërsa nga sot zyrtarisht pjesë e saj janë shtatë anëtarë. Për një funksionim të plotë, Gjykata Kushtetuese duhet të këtë në përbërjen e saj nëntë anëtarë.

Kreu i shtetit në dekretin e djeshëm u shpreh se këtë vendim e ka marrë duke pasur parasysh nevojën jetike që ka Shqipëria për bërjen funksionale sa më parë të Gjykatës Kushtetuese. Ngritja e saj ka qenë një ndër kushtet, që BE-ja kishte caktuar për Shqipërinë për mbajtjen e Konferencës së Parë Ndërqeveritare.

Kryediplomatja e SHBA-së Yuri Kim dhe ai BE-së Luigi Soreca kanë apeluar vazhdimisht tek autoritetet, që Gjykata Kushtetuese të bëhej funksionale brenda 31 dhjetorit të këtij viti, objektiv ky, i cili u arrit me betimin e Përparim Kalos. Ambasadorja Yuri Kim pak ditë më parë në një intervistë ekskluzive i tha Euronews Albania se pas plotësimit të Gjykatës Kushtetuese, projekti i radhës ku SHBA-ja do jetë e fokusuar është ngritja e Gjykatës së Lartë.

Lexoni gjithashtu: 

Gjyqtarja e 7-të e Kushtetueses/ Cila është Sonila Bejtja

Ambasadorët Soreca dhe Kim përshëndesin emërimin e gjyqtarit të 7-të Kushtetuese

Vakancat në Gjykatën Kushtetuese, KED i çon emrin e radhës presidentit Meta

Ekskluzive/ Ambasadorja Yuri Kim: Gjykata Kushtetuese është funksionale, mos u shpërqendroni nga propaganda dhe konspiracionet