SPAK merr të pandehur vëllanë e ish-presidentit Nishani

Gjykata e Posaçme kaloi për gjykim këtë të hënë dosjen ndaj 3 ish-inspektorëve të Ministrisë së Mjedisit dhe 2 mjekëve.

Bëhet fjalë për inspektorët, Ilir Nishani, vëllanë e ish- Presidentit te ndjerë Bujar Nishani, Genci Hickën dhe Gerson Tafën që akuzohen për korrupsion pasiv dhe dy mjekët, Kostandin Balloma dhe Besim Boçi.

Këta dy të fundit do gjykohen për korrupsion aktiv.

Hicka, Tafa dhe Nishani u kishin kërkuar klinikës ku punonin dy mjekët Balloma dhe Boçi, 30 mijë lekë në mënyrë që të mos i gjobisnin për mungesën e trajtimit të mbetjeve spitalore.

Ka qenë vetë mjeku Kostandin Balloma që i ka kallëzuar në SPAK 3 inspektorët pasi u dha pagesën që ata kishin kërkuar në vlerën e 30 mijë lekëve.

Disa ditë pasi SPAK njoftoi mbylljen e hetimeve dhe i mori të pandehur inspektorët, Gjykata e Posaçme, e përfaqësuar nga gjyqtari Erion Bani, ktheu për të dytën herë aktet në ngarkim të tyre.

Gjykata i kërkoi prokurorit që të marrë të pandehur edhe dy mjekët, dosja e të cilëve u kalua sot për gjykim.

LEXONI GJITHASHTU: 

• Eksperti: Rusia mund të sulmojë NATO-n, këto janë vendet që do ta pësonin të parat
• U vetëvra se iu publikua foto intime, 27-vjeçarja ishte nënë e një fëmije (Detaje)