Spanja në mëshirë të flakëve, zjarret i afrohen Madridit, të paktën 1 i vdekur

Ekipet e zjarrfikësve në Spanjë kanë kufizuar avancimin e zjarreve në afërsi të Madridit, që vranë një person dhe bënë që disa dhjetëra banorë të evakuoheshin.

Rreth 180 persona u larguan nga zonat Soto de Viñuelas dhe Fuente El Fresno, në rajonin Tres Kantos.

Flakët përfshinë një kompleks shtëpish në Soto de Viñuelas, duke i shkrumbuar tërësisht ato. Bilanci i dëmeve, sipas autoriteteve lokale, duhet ende të llogaritet.

Personi që humbi jetën mori plagë të rënda në momentin kur flakët përfshinë banesën e tij, duke i djegur 98 për qind të trupit. Ai u dërgua me helikopter në një spital të Madridit, ku ndërroi dhe jetë.

Në vijim të njoftimit të tyre, autoritetet lokale nënvizuan se zjarri në afërsi të kryeqytetit spanjoll kishte avancuar 6 kilometra në vetëm 40 minuta.

Gjithashtu, mediat vendase raportuan se zjarri bëri që të ndalonte trafiku në aksin M-607, që lidh Madridin me komunën Kolmenar Vieho, në veri të kryeqytetit.

Të hënën, zyrtarët lokalë në qytetin jugor të Tarifës, në rajonin Kadiz, urdhëruan evakuimin e rreth 2 mijë njerëzve për arsye sigurie, pasi zjarret në pyje iu afruan zonave të banuara.

Spanja po përballet me verën më të vështirë sa i takon zjarreve në dekadat e fundit. Mbi 39  mijë hektarë tokë janë djegur nga 1 janari deri më 3 gusht të këtij viti, një zonë 9 për qind më e gjerë se e ajo e djegur në të njëjtën periudhë të vitit 2024.

LEXONI GJITHASHTU:

• Zjarret në Gramsh, përfshihet nga flakët fshati Harunas! Rregjistrohen 6 të plagosur
• Mali i Zi: 1 ushtar i vdekur, 1 tjetër i plagosur në përpjekje për të shuar zjarre