Spanja planifikon taksë 100% për shtëpitë që blihen nga shtetas jashtë BE-së

Spanja po planifikon të vendosë një taksë deri në 100% për pronat e blera nga shtetas jashtë BE-së.

Kryeministri Pedro Sánchez tha se masa “e paprecedentë” ishte e nevojshme për të përmbushur urgjencën e strehimit në vend.

“Perëndimi përballet me një sfidë vendimtare: Të mos bëhet një shoqëri e ndarë në dy klasa, pronarët e pasur dhe qiramarrësit e varfër,” tha ai.

Banorët nga vende jashtë BE-së blenë 27,000 prona në Spanjë në vitin 2023. Sanchez nënvizoi gjatë një forumi ekonomik në Madrid, se këto prona u blenë “jo për të jetuar”, por “për të fituar para prej tyre”.

Sánchez nuk dha detaje se si do të funksiononte taksa dhe as një afat kohor për paraqitjen e saj në parlament për miratim. Por qeveria e tij tha se propozimi do të finalizohej “pas një studimi të kujdesshëm”.

Është një nga një duzinë masash të planifikuara të shpallura nga kryeministri të hënën që synojnë përmirësimin e përballueshmërisë së banesave në vend. Masat e tjera të shpallura përfshijnë një përjashtim nga taksat për pronarët që ofrojnë strehim të përballueshëm, transferimin e më shumë se 3,000 shtëpive në një organ të ri të banesave publike dhe rregullore më të rrepta dhe taksa më të larta për banesat turistike.

“Nuk është e drejtë që ata që kanë tre, katër apo pesë apartamente me qira afatshkurtër të paguajnë më pak taksa se hotelet,” tha ai.

LEXONI GJITHASHTU:

• Protestuesit kundër turizmit në Barcelonë qëllojnë me pistoleta uji ndaj vizitorëve
• Spërkatën turistët me ujë, Ministri spanjoll dënon veprimet e protestuesve