Spanja pritet të mirëpresë 100 milionë turistë këtë vit

Spanja ka të ngjarë të arrijë objektivin e saj prej 100 milionë mbërritjesh turistësh të huaj këtë vit gjatë sezonit vendimtar të verës, një fakt i përforcuar nga pasiguria në lidhje me Lindjen e Mesme, u tha sot gazetarëve Ministri i Industrisë dhe Turizmit Jordi Erreu.

Në vitin 2025, një total prej 96.8 milionë turistësh vizituan Spanjën, që përfaqëson një rekord të ri dhe një rritje prej 3.2% krahasuar me një vit më parë.

Gjatë periudhës qershor-shtator, vendi pret 43 milionë turistë, që përfaqëson një rritje prej 6% krahasuar me të njëjtën periudhë në vitin 2025.

Ky fluks vizitorësh do të shoqërohet me një të ardhur të vlerësuar prej 64 miliardë eurosh, 10% më shumë se verën e kaluar, duke forcuar rolin e turizmit si një forcë lëvizëse për rritjen ekonomike të Spanjës dhe duke e ndihmuar vendin të performojë më mirë se partnerët e tij evropianë, njoftoi ministri.

Gjatë këtyre muajve të verës, ministri theksoi se zonat e brendshme dhe e ashtuquajtura Spanja e Gjelbër (E.T.S.: zona bregdetare veriore e Gadishullit Iberik që laget nga Oqeani Atlantik dhe përfshin komunitetet autonome të Galicias, Asturias, Cantabria dhe Vendit Bask) do të shënojnë një rritje më të madhe.

Ministri theksoi gjithashtu ndikimin pozitiv në rezervimet e hoteleve, kampingjeve dhe agroturizmit.

Sipas ministrit, shumë akomodime rurale janë tashmë të rezervuara plotësisht, pjesërisht për shkak të interesit për eklipsin diellor të gushtit që do të jetë i dukshëm në një pjesë të gjerë të Spanjës rurale dhe veriore.

Ministri tha se tërheqja e turistëve në brendësi të vendit në zona më pak të njohura do ta ndihmonte gjithashtu Spanjën të përballonte turizmin e tepërt në destinacionet e njohura bregdetare, gjë që ka shkaktuar reagime negative nga banorët. Ai u kërkoi qeverive rajonale të menaxhojnë ofertat turistike, duke argumentuar se kërkesa do të vazhdojë të rritet.

Ereu theksoi gjithashtu se një nga elementët kryesorë të fushatës verore është rritja e shpejtë e rezervimeve të minutës së fundit, një trend që është vërejtur tashmë në prill dhe maj dhe që mund të rrisë më tej parashikimet fillestare.

“Padyshim që do ta arrijmë objektivin prej 100 milionësh nëse ky trend vazhdon. Do të jetë pasojë e natyrshme”, tha ministri.

Në ndryshim nga parashikimet që karakterizoheshin nga pasiguria në fund të marsit për shkak të konfliktit në Lindjen e Mesme në prag të Pashkëve, ministri theksoi se sot sektori vepron brenda një “realiteti më të qartë” me të dhëna më të qëndrueshme.

Në muajt e fundit, konflikti në Lindjen e Mesme i ka larguar disa udhëtarë nga destinacionet në rajon dhe ka rritur kërkesën për vendet e Mesdheut Jugor, përfshirë Spanjën.

“Tre muaj më parë menduam se konflikti në Lindjen e Mesme do të ngadalësonte mbërritjet e turistëve, por të dhënat tregojnë një qëndrueshmëri të jashtëzakonshme pavarësisht kushteve”, vuri në dukje ai.

Deri më 1 tetor, parashikohet që numri i vizitorëve të arrijë në gati 80 milionë, një performancë më e fortë se sa pritej nga autoritetet në mars.