Netanyahu sulmon Erdoganin dhe i kërkon SHBA-së të mos i shesë Turqisë avionët F-35

Kryeministri i Izraelit, Benjamin Netanyahu, i bëri thirrje Shteteve të Bashkuara të mos vijojnë me shitjen e sistemeve të avancuara të armëve Turqisë, duke argumentuar se një vendim i tillë do të cenonte ekuilibrin strategjik në Lindjen e Mesme.

Në një intervistë për Fox News, Netanyahu e kritikoi ashpër Ankaranë, duke e cilësuar Turqinë si “një regjim të ndikuar nga Vëllazëria Myslimane”. Ai deklaroi se Ankarasë nuk duhet t’i jepen avionët luftarakë F-35 apo motorët F110 për flotën e saj ajrore.

“Nuk besoj se atyre duhet t’u jepen F-35 ose motorë për avionët e tyre luftarakë”, tha Netanyahu, duke reaguar ndaj deklaratave të Presidentit amerikan Donald Trump, i cili muajin e kaluar la të kuptohej se mund të mbështeste shitjen e motorëve F110 për avionët turq dhe rikthimin e Turqisë në programin F-35.

Sipas kryeministrit izraelit, një zhvillim i tillë do të “përmbyste ekuilibrin e fuqisë në Lindjen e Mesme”, i cili, sipas tij, mbështetet në epërsinë ajrore të Izraelit dhe praninë ushtarake amerikane në rajon.

Netanyahu u shpreh se Turqia është “një vend i madh”, por drejtoi kritika të forta ndaj presidentit Rexhep Tajip Erdogan, duke pretenduar se ai “e kërcënon hapur Izraelin me shkatërrim” dhe duke përmendur gjithashtu praninë ushtarake turke në pjesën veriore të Qipros.

Duke folur për marrëdhëniet me presidentin amerikan Donald Trump, Netanyahu tha se mes tyre ekziston një bashkëpunim i ngushtë, pavarësisht disa mospajtimeve.

“Ne i shohim pothuajse të gjitha në të njëjtën mënyrë. Kemi mosmarrëveshje herë pas here, por i zgjidhim ato sepse jemi aleatë”, u shpreh ai, duke shtuar se të dy liderët diskutojnë hapur për çështjet ku kanë qëndrime të ndryshme.

Sa i përket Iranit, Netanyahu përsëriti se Teherani nuk duhet të lejohet të sigurojë armë bërthamore apo mjetet për përdorimin e tyre.

“Kjo është një luftë për lirinë kundër fanatizmit”, deklaroi ai, duke e cilësuar Iranin si një kërcënim jo vetëm për Izraelin, por edhe për interesat amerikane.

Kryeministri izraelit tha gjithashtu se dobësimi i ndikimit të Iranit në rajon mund të krijojë kushte për përparim në procesin e paqes me Libanin dhe për marrëveshje të reja rajonale.

Në fund të intervistës, me rastin e 250-vjetorit të pavarësisë së Shteteve të Bashkuara, Netanyahu e cilësoi Amerikën si “një forcë të madhe për të mirën”, duke shtuar se “pa Amerikën nuk do të kishte demokraci apo liri në botë”.

WATCH: Netanyahu on Türkiye:

I don't think they should be given F-35s or the engines for their fighter jets, because that'll upset the power balance in the Middle East, which is ultimately guaranteed by Israeli air superiority and also by, I think, America's posture in the… pic.twitter.com/OnP40YYk6U

— Clash Report (@clashreport) July 6, 2026