“Besa, deklaratë e kryeministrit në rrethana shtrënguese”, juristja Jorgo: Në shesh janë shqiptarët e zhgënjyer

Juristja, Mirela Jorgo e ftuar këtë të diele në emisionin “Review” me Greta Topjana në Euronews Albania ka komentuar lidhur me dokumentin “Besa” të kryeministrit Edi Rama të prezantuar në mbledhjen e së premtes me grupin Parlamentar të PS-së dhe kabinetin qeveritar.

Jorgo gjatë fjalës së saj u shpreh se deklarata e kryeministrit për “Besën” nuk ka asnjë vlerë apo nocion juridik.

Sipas saj, “Besa” është thjesht një deklaratë e bërë në rrethana shtrënguese për të gjetur një rrugëdalje nga situata ku ndodhet, me protestat në vend.

“Thjesht një deklaratë e kryeministrit në rrethana të shtrënguara për të bërë me ata lloj protestuesish, për të gjetur një rrugëdalje nga kjo situatë shumë shtrënguese që ndodhet kryeministri.

Nga ana juridike, nocioni juridik nuk ka vlerë fare. Mund të jetë një nocion moral, duke u nisur me atë ç’ka ka shqiptari për konceptin e besës ndër shekuj, por që nuk ka lidhje të paktën me kryeministrin në atë profilin e tij për katër mandate, të cilët shumë herë, se jo pa të drejtë, dalin ata shqiptarë, kanë mbushur rrugët, kanë 57 ditë, sepse aty janë të gjitha llojet e kategorive, të gjitha llojet e rrymave.

Që do të thotë aty ka shqiptarë të zhgënjyer për pjesën ekonomike, aty ka të zhgënjyer për pjesën e trashëgimisë kulturore, aty ka shqiptarë të zhgënjyer për arsimin, për shëndetësinë.

Janë shumë problematika në atë lloj proteste, në atë lloj bulevardi. Sepse mund të dali tashi kryeministri thotë ‘më kanë ngrënë kumbulla dhe dardha'”, tha ajo.